Yenibaxis.az olaraq vətəndaşların şikayətlərini işıqlandırmaqda davam edirik. Bu dəfə yenibaxis.az saytının baş redaktoru Aysel Abdullazadə yaşadığı ünvanda təbii qazın olmamasından narazılığını bildirib. Həmin şikayət məktubunu olduğu kimi diqqətinizə çatdırırıq:
“Mən Abdullazadə Aysel Nizami qızı Abşeron rayonu, Xırdalan şəhəri, Quşçuluq massivi, Səttar Bəhlulzadə küçəsində yaşayan sakinəm. Altı ildir, bu ünvanda yaşayıram. Xırdalan şəhərində mavi yanacaq – qaz sisteminin verilməsində böyük problemlər yaşayırıq. Xüsusən də, qış aylarında qaz verilməsi demək olar ki, dayandırılır.
Bu günlərdə, daha dəqiq, dekabr ayının 28-dən etibarən yaşadığım ünvana qaz verilməsi dayandırıldı. Qonşulardan maraqlandım, məlum oldu ki, qaz kəsilməsi ilə əlaqədar yenidən qaz verilərkən bizim sayğacda problem yaranıb (klapanlar qazı buraxmır). Zəif də olsa, qonşularda qaz yandığı üçün sayğacla bağlı problemə görə qaz idarəsinə müraciət etməli oldum.
Qaz idarəsi adına qeydiyyatlı olan beş ayrı-ayrı şəhər telefon nömrələrindən heç biri ilə əlaqə saxlamaq mümkün olmadı. Zəng olunan nömrələr ya məşğul göstərirdi, ya da dəstəyi qaldıran olmurdu. Yanvar ayının 6-na qədər bu şəkildə soyuqda qaldıq.
Nəhayət, Yanvarın 6-da Abşeron rayon Qaz İstismar idarəsinə getdim. Orada problemimlə bağlı məlumat verdikdən sonra onların edə biləcəyi bir iş olmadığını bildirdilər. Əlavə olaraq, sayğacla bağlı yaranmış problemə görə, mənə 104 və ya 185 nömrəli telefona zəng etməyimi, onlarla əlaqə saxlayıb məsələni onlara bildirməyimi “məsləhət gördülər”. İdarədə çalışan birinin: “çalış, bu nömrələrə düşə biləsən, əlaqə saxlaya bilsən, denən həll etsinlər” dedi. Bu “çalış, düşə bilsən” ifadəsi beynimdə sual işarəsi yaratdı. Nömrə 24 saat aktivdirsə, niyə də əlaqə saxlamaq belə çətin olsun ki?
Evə qayıdıb bu nömrələrə zəng edəndə həmin o idarədəki adamın fikrini tam olaraq indi başa düşdüm. 104 və 185 nömrələrinə dəfələrlə zəng etməyimə baxmayaraq, qarşı tərəflə əlaqə qurmaq mümkün olmadı. Nömrələrə zəng zamanı dəstəyi qaldıran operator belə olmadı.
Abşeron rayon Qaz İstismar idarəsindən şikayətçiyəm. Əvvəla, qaz sistemi kartla olsa belə, bir dəfə nəzarətçi qapımızı döyməyib. Kart sistemi dərdimizi də ona deməyimiz anlamınımı daşıyır? Əraziyə nəzarət edən müfəttiş və ya hansısa məsul şəxs yoxdurmu?
İkincisi, bu qaz idarələrində növ-növ nömrələr oyuncaq telefon xarakteri daşıyır yoxsa sadəcə görüntü məqsədlidir? Niyə bir Allah bəndəsi bu telefonu bir dəfə dəstəyini qaldırıb heç olmasa, “bizlik deyil” sözünü belə demir? Mütləq lazımdır ki, idarəyə baş çəkək?
Və son olaraq, 104 və 185 saylı nömrələrdə nə üçün sayğacların üzərində tək əlaqə vasitəsi kimi göstərildiyi halda, abonentlərin zənginə cavab verən olmur?
Bu qış soyuğunda dərdimizi kimə deyək? Bu işə məsul şəxslər kimlərdir? Mavi yanacağın normal təminatını kimdən tələb edək?
Yoxsa deyirsiniz, soyuqdan ölənin canı cəhənnəmə?”
Qarşı tərəfin də mövqeyini dinləməyə hazırıq.
yenibaxis.az
Yorumlar
Yorum Gönder