Kişilər, nailiyyəti olan, uğur əldə edən, zirvəyə yüksəlib orada qalmağı bacaran qadınları həyat yoldaşı kimi daşıya bilmirlər. Toplumda söz sahibi olan qadın azad düşüncəli, sərbəstdir və ayaqları üzərində dayanmağı o kişini tanıyana qədər öyrənmişdi. Kişilər bacarıqlı, kültürlü, yüksək biliyə sahib, zəkası geniş və dünyagörüşlü xanımlarla bir ortamı paylaşmaqdan böyük zövq alarlar, o ortamda belə bir xanımla ünsiyyət, dostluq onlara qürur verər. Hətta sevgili belə ola bilərlər. Amma söz qonusu o xanımı həyat yoldaşı etməkdirsə, bundan qaçarlar. Səbəbi çox sadədir. Bir kişinin içində daşıdığı özgüvən nə qədər böyük olmalı ki, o qadının varlığını, onun həyat yoldaşı olma psixologiyasını qaldıra bilsin... İlklərdə bəsit fikir kimi görünə bilər. Amma yaşantıya gəlincə niyə bu “bəsit” hesab etdikləri fikrin çəkisindən qorxurlar?!
Azərbaycan kişisi evlənərkən bu hallara xüsusi diqqət edir. Hətta bir zaman öncəsinə qədər oxumuş, ali təhsilli qadın bəyənilmirdi və evlənmək üçün normal evlilik adayı sayılmırdı. Bu, indiki dövrümüzdə bəzi kişi təfəkküründə hələ də qalmaqdadır. Evlilik həyatı üçün savadsız, çox da üstün zəkaya sahib olmayan, bilgisi qısıtlanmış, dünyaya və ən əsası cəmiyyətə açılmamış qadınlara üstünlük verirdilər. Bu kişilərin ağlınca evdə oturan, heç bir texnologiyadan başı çıxmayan, kitab qapağı qaldırmayan qadın həyat yoldaşı kimi daha idealdır və baş ağrısızdır. Çünki bu qadın ömür yoldaşını sorğulamaz, evdən kənar həyatına qarışma haqqına sahib olmaz, yaşam alanı dairələnmişdir. Kişi, evdə oturan və ona sadəcə övlad doğub, onun qayğıları ilə məşğul olan, həyatı dairələnmiş və o dairədən kənarda heç bir şeyin olmadığına inanan bir qadınla daha rahat həyatını yaşayar. Bir də əksini düşününün...
Özgüvən bir kişinin qadınını sərbəst buraxması və normal həyat yaşaması üçün vacib faktordur. Özgüvəni olmayan kişi toplumsal həyata atılmış həyat yoldaşını qısıtlamağa məhkumdur. İçində yaranan bəsit qısqanclıqlar, aşırı çərçivələmələr ikisinin də həyatına mane olacaq və nəticədə çözülməsi mümkünsüzə çevrilən sorunlar meydana çıxacaq. Bu üzdən kişilərin ailə qurmaq üçün ideal qadın seçimləri yuxarıda qeyd etdiyimiz formada olanlardan ibarət olur.
Özgüvəni olan, qadınının ağırlığını daşımağı bacaran, ona aid olan həyat yoldaşının zirvələri fəth etməsi (yazar, jurnalist, mühəndis, mühasib, sayt-qəzet rəhbəri, TV təsisçisi, layihələr müəllifi, məşhur bir cərrah, deputat, diplomat, hüquqşünas-vəkil ... və.s) nədənilə qürurlanan kişi daima onun dəstəkçisidir. Belə ailələr ziyalı təbəqə hesab olunur və ailədən əlavə, həm də yaxşı iş yoldaşı, yaxşı iki müsahib, həmsöhbət və dost olurlar. Ortaq həyatı, ortaq mövzuları və müzakirələri olan insanların yaşamı daha üstün, daha rəngarəng və uzunömürlü olmağa müvəffəqdir.
Sizə aid olan qadının intellektual çəkisindən qorxmayın, ona sərbəstlik verməkdən çəkinməyin. Dəstək olub, yanında, arxasında olmaqla həyatınızı asanlaşdırın, bəsitlikdən kənar, xaruquladə bir yaşam seçin...
Aysel Abdullazadə
06.09.2015
Yorumlar
Yorum Gönder